حاجات نفسى أبطلها

كل ما أقابل حد جديد ... أفضل ادوشه بالحاجات اللى بتضايقنى و نفسى أبطل أعملها
بس برده ... موش ببطلها
يعنى مثلا ... خدوا عندكم
لو ماشيه على سيراميك بحب أمشى على بلاطه وبلاطه ... يعنى رجل فى مربع و أعدى مربع و انط على اللى بعده
طبعا ببقى هبله خااااالص
كمان لما بترفز ... أفضل ازعق و ادخل الكلام فى بعضه ... و برده ببقى هبله خاااالص
نيجى بقى للشوبنج ... كارثه كل البنات
أنا بقى كارثى كارثتين ... لانى مجنووووونه بالشوزات وو الصنادل
ممكن أجيب من نفس الحاجه لونين او من نفس اللون ميت حاجه ... و ببقى موش محتاجاهم ... ولا مريحنى
بس موش بهدى ولا انبط غير لما ادخل البيت و فى ايدى شوز جديد
كمان بحب أمسك شويه من شعرى و أفضل ألعب فيهم و ألفهم على صوابعى لما ابقى مركزه ... وربنا رحم الناس من حركه الهبل ديه لانى محجبه ... هى بتخنق العائله الكريمه بس
و نرجع للهبل بقى ... بحب اوى ألمع النضاره و أنا لابساها ... و بابا هيطردنى من البيت قريبا بسبب الحركه ديه
و الأفظع من كل دول ... موش بعرف أقعد فى اى مكان غير لما أحط رجل على رجل ... هى موش تناكه ... بس تقدروا تقولوا تخانه مخ
انا موش هكمل بقيه الحاجات عشان ما تتصدموش كده من أولها
لو قابلتوا اى حد بيعمل حركه من دول ... ابقى اتاكدوا ليكون الشخص ده انا